الجزء السابع عشر
مر اسبوع على وقاة امي .. ودرة صلاح وسوالهم سالفه .. للحين مايكلم خالد على اللي صار .. وطول هالاسبوع حابس روحه بالغرفه ويبجي بصمت .. ماادري متى بيرد لندن ..واانا للحين ماشفته الا مرة وحده اول مايا .. وكان مصدوووم لدرجه اني ماكنت قادره احط عيوني بعيونه .. يمكن راح انهار .. أو يصير فيني شي
وانا كل يوم عن يوم حالتي تزداد سوء .. كنت احس بضعف بجسمي كله .. اكلي قليل ومااقدر انام .. كنت افز كل يوم على صوت المكالمه باذوني .. كنت افز وجني مخنوقه .. ولا غرقانه .. واقعد طوول الليل ابجي .. منور وحصوص ومهاوي .. حتى خالتي ناديه ماتركوني كلش .. محد كان حاس بالنار اللي فيني .. ولا احد يدري عن اللي ادري عنه .. الكل عباله ان امي ماتت جذيه من غير شي .. مايدرون منو سبب موتها ... مايدرون منو اللي ذبحها ووقف هالقلب اللي ماينبض غير حب وطيبة .. مايدرون ان اللي ربته كل هالسنين اهوا بايينه يطعنها من الظهر .. مايدرون ...
ابوي ماشفته للحين .. انتوا متخيلين الوضع .. ابوي كان حياتي كلها .. الحين مااقدر اشوفه .. كنت اصرخ بس اشوف ويهه ... واصرخ حييييييييل ..
لكن للحين مابجيت .. للحين اسمع صدى صوت الغاليه يرن باذني وهي تقولي .. قومي شيوخ .. ماشبتعتي نووم .. تعالي شيوخ .. ساعديني نطبخ العشا .. تعالي شيوخ دلكي ريوولي ... تعالي شيوخ شريتلج روب يديد
تعالي حبيبتي .. شوفي هالتراجي شحالتهم خذتهم حقج ...
ااااااااااه ياالقهر اللي بداخلي .. اااااه يالغاليه .. شلون تروحين .. وانا من لي بهالدنيا .. .انا من غيرج مااقدر اعييش مااقدر
حسيت اني صج صج تعبانه .. كانوا البنات يتحجون حواليني .. لكن ماكنت اقدر اشاركهم بولا كلمه .. كنت اشوف مهاوي تحاول تلطف الجو .. حصه كانت تضحك بالغصب .. منور شيل وتحط وهي تمش دموعها .. خالتي تتذكر وتصييح .. وانا ساكته .. اشوف واسمع .. لكن عقلي وروحي مع اللي راحت
بعد دقايق دخل خالد
خالد : منور .. حصوص .. تعالوا عزوز يبي يعزيكم
فتحت عيوني .. فزيت رغم التعب اللي انا فيه .. شفت منور وحصه نزلوا .. هذيلي وين رايييحين .. ليش ينزلوا .. وهالحقير ليش ياي ...!!! له عييين يينا عقب اللي سواه .. له عين يطب هالبيت اللي احتواه كل هالسنين وبالاخير هدمه بيديه ..
كانت مها تكلمني باستغراب بس ماكنت اسمع شتقول .. ماادري من وين يتني القوة .. لبست شيلتي .. ونزلت وانا بكل خطوة كنت احس اني بطييح من طولي ..
نزلت من الدري وشفت الحيوان قاعد .. وقاعد مكان المرحومه بعد .. لك عيين بعد ...
خزيته بكره وقلت بصراخ وانا اشرله صوب الباب
شيخه : اطــــــــــلع بره
شفت خلود والبنات وقفوا بذهول ... وسكتوا
شيخه : ماتسمع .. قلتلك اطلع بره !!! ... بره
خالد : شيووووووووووووخ !!
وصرخ صرخه هزت البيت كله
شيخه : انتوا شنو .. ماعندكم احساس .. هالحقييييير اللي قاعد .. اهوا اللي ذبح امكم .. اهو وعمتة الخاااايسه .. ناكر المعروف .. مابين بعينه كل هالسنين .. كل هالخير .. عض الايد اللي انمدت له .. اللي احتوه يوم عافه الكل .. وعقل كل هذا .. جازاه بطعنه .. وقف قلبها عسى ربي يوقف قلبه .... اطـــــــــــــــــــــلع بــــــــــــــــــــــــره تفهم !!!
وعلى اخر كلمة نطقها لساني .. ياني طراااااق من خلود .. عمري وحياتي .. ماشفت مثله .. لدرجه انه يطيحني من طولي .. لكن مع هذا .. مادري من وين يتني القوة .. وصرت اصرخ : اطلع يالحقير ... اطلع يالساااافل .. بره
كان عزوز مصدوم وبنفس الوقت سااااااكت ويخزني بنظرة جهلتها .. وببرود قتلني .. شال روحه استأذن بعد مارمقني بنظرة .. وطلع
خلود الحقة .. ومنور وحصوص يو صوبي ..
حصه : انتي ينيتي ... عزوز شعليه ... !!!
قلت وانا للحين بنبرة الصراخ : عزوز .... ترى مرت ابوج تصير عمته .. عبالج اهوا مو مخطط معاها على هالشي .. لايخدعكم مظهره .. اهوا السبب .. اهوا الحقيييير
انتوا ماتدرون عن شي ... حصوص .. ترى امي ماتت من الصدمه .. كانت مرت ابوج داقه عليها وتزف لها خبر زواجها.. وانها خذت ريلها .. امي ماتحملت الصدمه وطاحت .. انا كنت فوق ويوم نزلت وشفتها وشلت التلفون .. قالتلي انا مرت ابوج .. ماتبين تباركيلي !!!
وبعد هذا كله تقوليلي اهوا شعليه !!!
منيرة : كل هذا صار شيوخ !!! .. وليش ماقلتلي !!
شيخه : ماكنت مصدقه اللي يصير منور .. احس انه حلم
وقعدت ابجي .. وابجي .. وابجي .. حسيت ان دموع الدنيا كلها بعيوني .. حسيت وجنه سجاجين بصدري وقلبي .... ااااه ياحر قلبي عليج يايما ... ااااه
حصه : شيووخ .. عزوز ماله شغل .. عزووو .....
شيخه بنرفزة : لاتقولين ماله شغل ... هييييين والله والله ان مادفعته الثمن غالي .. ماكون بنت امي
الجانب الثاني
طلعت من بيت خلود وانا شبهه تاااايه .. كنت اسمع خلود يناديني .. بس مارديت عليه .. ماكنت قادر اوقف ولا دقيقه .. ولا ثانيه .. كنت احس ان كلشي غلط بهالدنيا انا سببه .. انا السبب في كل ضيقه او حزن .. انا شنو .. ليش ربي ماخذاني بدال اميي ليييش ... !! .. ليش اتعذب كل هالعذاب
ركبت سيارتي وطرت قبل لايلحقني خلود ... صرت امشي .. وامشي ماادري وين راايح .. بالاخير وقفت عند مقبره صبحان .. نزلت ورحت عند قبر امي رضيه .. سلمت عليها وقعدت حاط ايدي على ريولي .. بجييت .. احس الدنيا ضاقت فيني يما .. احس مافيه احد غيرج بهالدنيا يحبني .. ليش ربي ماخذاني بدالج .. ليييش !!!
تميت ساعات وساعات قاعد على قعدتي هذي .. حتى تلفوني سكرته .. تذكرت صدمتي يوم شفت ابوخالد مع عمتي ثالث يوم العزا واقفين بره .. ويوم قربت منهم قالتها عمتي بكل وقاحه .. تزوجت
حسيت وقتها وجني تجمدت .. حسيت ببرود يجتاح دمي .. كان كلشي فيني واقف عن الحياة ..
وللاسف .. غلطة اثنين لازم انا اتحملها .. لاني لازم اتحمل كلشي .. لاني يتيم .. يتييييييم ... ااااه تعبان يايمه تعباااااان
تذكرين يوم تقوليلي انت ولدي وانا امك ... اقص لسانه اللي يقول غير جذيه .. تعالي قوليلهم يما .. قوليلهم يخفون على ولدج شوي .. مو قادر اتحمل .. كلشي ضدي .. الناس والزمن .. والظروف .. حتى شيخه ..
قعدت اتذكر كلام شيوخ حرف حرف .. وكلمة كلمة .. اتذكر كلام اغلى الناس عندي .. شلون ييي طعنه بالصميم .. ومن منو !! شيييخه
لكن معليه .. الايام بيينا ياشيوخ .. الايام بيينا
قمت وركبت سيارتي وبهدوء فتحت تلفوني .. ودقيت على خالد
خالد : الو .. الو .. هلا عزوز وينك فيه ؟
عزيز : هلا خالد .. انا .. مشوار قصير جذيه وبروح الشركه .. اشوفك هناك
خالد سكت : ....... ... عزوز والله والله هالبنت زر عقلها من توفت الوالده .. قامت تخربط بكلام مو مفهوم .. احنا عرفنا شللي صار وندري ان مالك ذنبــ
عزيز : لاتكمل خلود .. لاتكمل .. انا نسيت اللي صار كله ..
خالد : انا .. اعتذر لك عنها .. واوعدك ان شيوخ بتعتذر لك
قلت بقلبي .. هذا بعد السما عن الارض
عزيز : مابيها تعتذر .. حصل خير .. يمكن صج انا سبب لكل المشاكل .. يمكن صج الاغلاط اللي صارت بهالدنيا انا السبب الاول فيها .. شيوخ ماغلطت خالد .. انا ليش ...!! ليش ربي ماخذاني وفكني من هالدنيا اللي ماشفت فيها يوم حلو .. ليييش !!
خالد : لاتقول جذيه عزوز .. والله والله هالبنت ان ماكسرت رااسها ماكون خالد .. انتا بتظل اخونا وواحد منا .. ينقطع لسانه اللي يقول غير جذيه .. شبوخ ياهل وماتعرف شتقول . .لاتاخذ على كلامها ولاعاد اسمع منك هالكلام تسمع
عزيز : احلفك بالغاليه اللي تحت التراب الحين .. ماتمس شعره من شيخه .. ولا شعره ولا تكلمها .. ولا تقولها شي
خالد : من صجك انت ... هذي يبلها تكسير راس
عزيز : خلوود .. والله اني ازعل عليك ومااكلمك .. انا بروحي زعلان منك لانك طقيتها كف .. ولاراح اسامحك عليه
خالد : كف كان شويه عليها على كلامها اللي مثل السم .. خلاص مثل ماتبي .. روح الشركه الحين يايك
عزيز : اوكيه ..يله باي
خالد :باي
سكرت من خلود وانا اتنهد .. ماادري شلون طلعوا مني هالكلمتين .. معليه .. انا اسوي فيها اللي ابي بس غيري لا .. محد يمس شعره من شعرها .. الايد اللي تنمد عليها اكسرها ... انا راح اعرف شلون انتقم منج ... والايام بتثبت
رحت الشركه .. وقعدنا نكمل شغل .. رغم اني احاول اكون طبيعي الا اني ماقدرت اخش نبرة الحزن فيعيوني .. كنت احس فعلا بالشتات والضيااع .. كنت احس بجرح .. وجرح جااايد .. مادري متى بيبرى ...
خالد رغم حزنه واحساسه بالذنب على اللي قالته شيخه .. يحاول يغير الجو ويدخلني بجو الشغل .. لكن ويين العقل ساهي والقلب مهموم ..
خالد يعرف عن بيتنا كلشي .. وعرف القصه اللي صارت .. مالي خلق اقولها لكم .. مع الايام بتعرفونها ..
عشان جذيه كان اكثر واحد يحس فيني بعد المرحومه ..
كنت بوادي يوم المهندس لؤي يشرحلنا النظام اليديد للاصدار الخامس من برنامج نازل بالسوق .. وماسمعت منه ولا كلمه . . الين مارن تلفوني .. واستأذنت وطلعت بره وشلته
عزيز : الو
عبير : الو ... مسا الخير
عزيز : مسا النور .. نعم !
عبير : اممم .. منو معاي ؟
عزيز : انتي منو .. انتي داقه ..!!
عبير بصوت نااااعم : انا قبل مده دقيت عليك وو .. الصراحه صوتك مافارق خيالي كلش ..
عزيز : وبعدين ؟
عبير : حابه اتعرف عليك .. انا اسمي عبير
عزيز : شكرا ياعبير .. مالي خلق اتعرف على احد .. باي
سكرته ورديت للشباب ولسرحاني مرة ثانيه
اليوم الثاني
شقة بوخالد
الساعه 4 ونص العصر
بوخالد : ياسارة ياحبيبتي ... خلينا من هالمشاكل وعوار الراس .. المرحومه ماصارلها مده متوفيه ... والعيال لحين دمعهم مانشف عليها .. تبين تسكنين هناك علشان مانشوف يوم حلو
سارة بتسلط ونبرة عاليه : انا مو متعوده اقعد بشقه .. وشرطنا كان انك تسكني بييت وانتا قلتلي نطري .. وهذي ام خالد توفت والبيت فضى .. شنو المشكله ؟
بوخالد : المشكله اهيا العيال ..
سارة : ولدك الكبير كلها ايام ويتزوج .. وبنتك خلاص بتروح بيت ريلها .. ولدك الثاني كلها يومين ويرجع بريطانيا .. ومافيه احد بالبيت
بوخال : .. بس شيخه ..!!
سارة بتصنع : شيخه بعيوني ... وبعدين ليش مصورني شريرة لهالدرجه .. عيالك اهم عيالي وبحبهم مثل مااحبك
بوخالد : بس ياسا...
سارة : لا بس ولا شي .. خل عنك هالكلام .. انا من باجر بروح البيت
بوخالد بانكسار واستسلام : خلاص .. مثل ماتبين . .انا اليوم اخبر العيال
بره الشقه
وتحديدا بره العمارة
عزيز
كنت موقف سيارتي بعيد .. بعد ماشفت سيارة بوخالد واقفه عند العمارة اللي عرفت انها شقتهم ..
كنت انطره يطلع علشان اشوف عمتي .. حتى لو سوو هالشي من وراي .. مجبورين يواجهوني فيه الحين
بعد ماتأكد ان ابوخالد مشى .. رحت العمارة وسألت الحارس عن رفم الشقه وصعدت واول ماطقيت الجرس
فتحته عمتي .. انتوا متخيلين الموقف .. عمتي زوجة بوخالد
وامي رضيه ...!!!! شلون هانت عليه هالعشرة جذيه ...!!
سارة بصدمه : هلا عزوز
عزيز : مصدومه صح ... اشوفج ماتأثرتي يوم خذيتي ريال من عايلته .. شفيج الحين منصدمه ََ ماني خابر شي يهزج ولا يصفق ويهج جذيه
سارة وهي تدش شقتها ومعطتني ظهرها : شتبي ... ياي تحاسبني .. لاتنسى اني عمتك .. ومااسمحلك ترفع صوتك علي
قربت منها ولفيتها صوبي وبيأس شديد : ليييش ؟؟؟ .. مافيه غير بوخالد ... ليييش ؟؟؟
سارة : والله انا حرة .. اتزوج اللي ابي .. وبعدين انا ماسويت شي من غير شور .. ترى اخوي كان اول واحد موافق على زواجي
عزوز : ههههههه ابوي ....!!! ابوي السكران
هممم .. شسويتي .. رشيتي بفلوس حق الخمر .. وطبعا ماصدق على الله .. قالج روحي نادي الشيخ وانا موافق صح
سارة بصراخ : عزووووز ... لاتنسى اني عمتك .. مو انت اللي تحاسبني وتعلمني شسوي ؟
عزوز : والمصيبه انج عمتي .. تدرين الكلام ضايع وياج .. بس بقولج كلمة .. مصير اللي سويتيه بيرجع عليج
طلعت وسكرت الباب وراي .. وكل يوم عن يوم .. تزيد صدمتي في هالدنيا .. وفي الناس .. وحتى بروحي ..
تدرون صرت اشك بروحي .. اشك باللي تعلمته طول هالسنين .. اشك ان الخير اهوا الصح ..
انا تعبااان ... وينج ياشيخه .. انا تعباان
نفس الوقت
بيت الخالة فاطمه
مهاوي
كان الجميع متجمع في بيت الخاله العوده فاطمه .. كانوا المفروض يكونون في بيت المرحومه لكن بعد سالفه زواجه حلفوا الخالات انهم مراح يطبون بيته مره ثانيه .. حصه ومنيرة والبنات كلهم راحوا ... الا شيخه مارضت تروح مكان .. وسكرت الباب عليها وقعدت تبجي ..
حصه ماكان ودها تروح لكن خالاتها اصروا .. يبون يغيرون جو الحزن على البنات ويردون لهم روحهم بعد وفاة المرحمومه .. شكثر زعلت يوم دربت ان شيخه ماييت .. من توفت امها وتلفونها مقفل .. درينا انها سحبت الكورس الاول من الجامعه .. وصلاح للحين مايكلم خالد ..
سبحان الله شلون وضع هالعايله انقلب فووووف تحت بيوم وليله
كنا كلنا قاعدين ..ونسولف .. لكن في عيون كل واحد فينا هاله حزن .. وكآبه على اللي توفت .. ام خالد كانت تشع العايله نور وفرح وسعاده ... من كبيرها الين صغيرها
ناصر ماينشاف من العمليات اللي عنده .. كل يوم عنده حالة طوارئ .. وصار وقته مو ملكه .. خاصه بعد مارفضته شيوخ وتوفت ام خالد .. صار يقضي اغلب الوقت بره البيت ..
كانت حصوص طول الوقت قاعده مع خالتي فاطمه .. تبي تعرف عن مرت ابوها اكثر
واللي فهمته .. ان سارة اللي تصبر عمة عزوز .. كانت اهيا وام خالد وام عزوز ربع من الثنويه .. كل وحده فيهم بعد ماتخرجت تزوجت .. وطبعا ام خالد توفقت بزواجها وام عزوز كان زواجها في بدايته حلو الا اهيا .. تطلقت وهالشي سبب لها عقده .. صارت تلاحق ابو خالد وتدعي انه يبيها وحاط عينه عليها .. من غيرتها من ام خالد اللي كانت عايشه حياتها من احلى مايكون .. لكن كانت ماشالله عليها حكيمه .. ومن حست على سارة .. واجهتها لكن سارة كانت قويه .. ومن يومها تفارقوا .. ومارجعوا صديقات .. مرت الايام والظاهر عرفت هالمرة شلون تفر راس عمي بوخالد وتتزوجه بعد هالعشرة الايام .. وصار اللي صار
كنت حاسه شكثر البنات تعابى .. خاصه منور المسكينه .. اللي يشوفها مايقول هذي بعد جم اسبوع بتزوج ..
الله يكون بالعون
قطع علي تفكيري صوت تلفوني .. شفت الاسم وكان خالد
رفعته على طول .. لان مادق علي من توفت خالتي
مها : هلا خالد
خالد : هلا مهاوي .. شلونج
صوته كان تعبان بس ماحبيت اسأله : بخير الحمدلله .. انتا شلونك ؟
خالد : الحمدلله على كل حال .. انتي وينج ؟
مها : ببيت خالتي فاطمه
خالد : زيين انا بره بالسيارة . . طلعي بكلمج
مها بخوف : زيين .. دقايق واطلع
سكرت التلفون ولبست عباتي وشيلتي وطلعت .. لقيت خلود مسند راسه على السكان .. وشكله هلكااان .. بغيت ابجي .. والله بغييت ابجي .. قبلي عورني .. مااقدر اشوف خالد بهالوضع واسكت ..
دخلت السيارة وسكرت الباب وراي
مها : هلا حبيبي ..
خالد رفع راسه : هلا حبيتبي
مها : شفيك خالد .. تعبان
خالد بتنهيده : تعبان يامها .. تعباان ..
مها : سلامتك من التعب فيني ولا فيك .. ميخالف .. كلها ايام وتعدي ان شالله .. ازمه وتمر على خير .. انتا لازم تكون اقوى من جذيه خالد .. انت العود .. وكلهم محتاجين لك
خالد : بس انا محتاج منهو يطبطب علي .. ويواسيني مهاوي .. والله تعبت
مها : انا وين رحت حبيبي .. انت بس ريح بالك
شفت خالد يشوفني بعين مافهمتها عقب قالي : ابي اقولج على شي .. وصتني عليه الوالده قبل لاتموت .. احس انه حمل ثقيل .. وماني عارف شلون بيصير
مها : قوول .. يارب اقدر اخفف هالحمل عنك
شيخه
مر اسبوع على الاحداث .. اسبوع بارد وكئيب وحزين .. على قلبي .. صار للوالده اكثر من اسبوعين من توفت .. الكل رد لحياته الطبيعيه .. صلوح رجع لدراسته وللحين شايل بخاطره على خالد لانه ماقاله عن وافاة الغاليه .. حسيت فيه مسكين .. تخيلوا مايشوف امه قبل مايدفنونها .. ولاحضر عزاها بعد .. شكثر صعبه عليه ..
قلبي عورني على صلوح .. بس لو تشوفون شلون وداعي له كان بارد ومافيه أي مشاعر ..
ماادري شصار فيني بعد اللي صار .. احس اني صرت متبلده .. ماقمت احس باي شي .. حتى البنات عيزوا مني .. صرت شخص ثاني .. غير شيخه اللي مليانه حيويه وضحك ووناسه .. صرت وحده تبي تنتقم وتاخذ بثار امها مثل مايقولون ..
نسيت اقولكم .. اني سمعت ان خلود الاسبوع الياي بياخذ مها يومين دبي وبيتزوجون سكاتي من غير عرس ولا حفله .. كل التعب اللي تعبناه حق عرس خلود خلاص راح مع الرييح
الحين الساعه 8 ..
وانا بالصاله . .على حسب كلام ابوي حق خالد
اليوم بتيي شينه الحلايا بيتنا .. طبعا لاتخافون انا مرتبه كل شي .. ومسويتلها استقبال ماحصلش ..
اول شي قفلت دار المرحومه .. علشان ماتفكر انها بتنام فيها .. ونقلت اغراض ابوي كلها بالغرفه اللي تحت .. نبي ناخذ راحتنا ببيتنا .. والصراحه هذي عله .. خلها تحت ابرك
وثاني شي سويته اني وديت خدامتنا بيت حصوص .. اتعلل انها تبي تساعدها وعندها شغل .. والطباخه حرصت عليها ماتطبخ شي الا بشوري
خليني اشوف ياسويره .. انا ولا انتي بهالبيت ..... !!!
الجانب الثاني
حصه : والله ماادري هالبنت شقاعده تسوي !!
سلطان :ههههه الحين اهيا يايبه الخدامه هني .. علشان مرت ابوها تشتغل !!
حصه : ايه .. ولاتشوفها شسوت .. يااخوفي ابوي يمد ايده عليها .. بنت بليس فرت مخه وكلت عقله حسبي الله عليها
سلطان : لاتحاتين .. شيوخ تعرف شلون تتصرف .. بتاخذ حقها وزود ..
حصه : صح كلامك .. بس ترى شيوخ خنت حيلي .. من داخلها مجروحه .. لاتشوفها جذيه تخطط وتسوي .. اهيا من الداخل مكسورة سلطان ... احسها الضايعه بينا
سلطان : الا ماقلتلي .. منور اختج شبتسوي !!
حصه : ماادري .. خلود ان شالله الاربعا الياي بياخذ مرته ويسافرون يومين ويتزوجون سكاتي .. ومنور اعتقد نفس الشي .. بس باقي عندهم جم شغله ماخلصت بالشقه .. بس تجهز بتزوج
سلطان : عيل جذيه .. قولي حق شيوخ تي تسكن عندنا
حصه : تصدق .. والله فكره .. انا اخاف تستفرد فيها بنت بليس وتسوي فيها شي
سلطان : هههه من هالناحيه لاتخافين .. بس .. شيوخ قاعده تهدم مستقبلها .. لما تكون بعيده عن بيتكم شوي .. راح تفكر بنفسها احسن .. شوفيها الحين مو هامها الا شلون تطلع مرت ابوج من البيت
حصه : أي والله صدقت .. دريت انها سحبت الكورس من الجامعه بعد !!
سلطان : لاحول الله ولا قوة الا بالله .. وعمي داري بهالشي ؟
حصه : مااعتقد .. لو درى جان ماخلاها .. اصلا شيوخ الوحيده اللي للحين ابوي ماكلمها .. ماتدري شكثر يحبها .. عشان جذيه اتوقع مو قادر يواجهها ولا اهي .. مو قادره تواجه ابوي
سلطان : الله يرحمج ياخالتي .. كلشي تغير من رحتي
حصه اللي اغرقت دموعها عيونها وبطرف ايدها مسحت دمعه كانت بتطيح : الله يرحمها .. ويهديك يايبا
سلطان : لاتمسحين دموعج حصوص .. ابجي .. المرحومه تستاهل ان نبجي عليها
حصه ماقدرت تمسك روحها اكثر وطاحت بيدين سلطان وقعدت تبجي .. فعلا ماتحس بقيمه الواحد الا لما تخسره ويروح
الجانب الثاني
دوانيه بيت بوخالد
فيصل : خلاص منور .. مابقى لنا شي .. ليش ننطر ؟
منيرة : ماادري فيصل .. يعني امي توها متوفيه ؟؟
فيصل : واحنا مراح نسوي لاعرس ولاغيرة .. باخذج ونسافر مثل خالد اخوج
منيرة : وو شيخه !!
فيصل : شفيها شيخه
منور فكرت تقول لكن بالاخير ترددت ... شقولك يافيصل .. شيخه صارت المظلومه بينا .. بتم مع مرت ابو بهالبيت .. يااخوفي عليج ياشيخه
فيصل : منور حبيبتي .. شفيج ؟
منيرة : شيخه ماعادت مثل الاول فيصل .. نفسيتها تعبانه .. مااقدر اخليها بروحها .. عالاقل بس تتحسن شوي !!
فيصل : على راحتج .. خلاص سوي اللي تبين حبيبتي .. ومهما تكون هذي اختج
منيرة: تسلم حبيبي .. الله يخيلك لي يارب
فيصل بابتسامه : يله عاد .. ابي اشوف ابتسامتج .. مشتاق لها يالغاليه
منيرة اللي سمعت صوت سيارة بره ... وارتبكت .. اليوم بتيي مرت ابوي .. الله يستر بس
منيرة : هذا .. ابوي ومرته وصلوا ..
فيصل اللي فهم على منور وقام على حيله وقرب منها : خلاص حبيبتي انا ماشي .. وانا طالع بسلم على عمي ..!!
منيرة اللي مو مرتاحه .. ودها لو تطلع مه فيصل ولا تشوف شينه الحلايا تاخذ مكان امها بهالبيت .. تامر وتنهي وهم مثل الغرب فيه.. قلبها عورها بس تخيلت ان ابوها بيكون لوحده ثانيه غير امها ... ااااه يالقهر
نزلت راسي بضيق .. احاول اني اكون طبيعيه مع فيصل بس ماقدر
فيصل رفع ويهاا بايده : معليه حبيبتي .. كلها ايام وتعدي ..لايضيق خلقج .. موفي ايدنا شي .. وسعي بالج وان شالله مايصير الا الخير
هزيت راسي وانا ساكته
فبصل : اكلمج بس اوصل .. تبين شي ؟
منيرة : سلامتك ..
فيصل : يله مع السلامه
من طلع فيصل من الدوانيه .. طلعت انا الصاله ابي اشوفها .. تدرون شنو ... نسيت كلشي بس شفت شيوخ نازله وقاعده بنص الصاله وحاطه صينيه الجاي وتشرب ببرود
قربت منها وانا منفعله
منيرة : شيووخ مرت ابوي وابوي بره ... شكلهم وصلوا
شيخه : عساهم ماوصلوا !! شتبيني اسوي ..!!
منيرة : عادي عندج ؟
شيخه : لاحبيبتي مو عادي .. بتشوفين شبسوي .. ان ماطفرتها من البيت مااكون شيوخ
بيني وبينكم .. شفت الاصرار بعيون شيوخ ... ههههه الله يستر
قمت انا من سمعت صوت الباب ينفتح .. يمكن كنت متوترة اكثر من شيوخ اختي .. كان قلبي معورني ان مرة ثانيه تاخذ مكان المرحومه .. ماقدرت اتحمل شكل ابوي وهو واقف يمها .. وطلعت غرفتي على طول
الجانب الثاني
شيخه
كنت احس سجاجين تقطع قلبي ... وكل يوم عن يوم يزيد كرهي اكثر واكثر حق هالانسانه .. تخيلوا .. هذي اول مرة نتواجه فيها انا وابوي ... كنت قاعده بكل برود واشرب جاي .. لكن من الداخل كنت اغلي .. مثل الجاي اللي قاعده اشربه
ابوخالد : السلام عليكم
مارديت السلام ...
ابوخالد : شيخه ... تعالي
رفعت عيوني بعيون ابوي .. وقمت ونظرات الاحتقار ماشلتها من سويرة .. كنت احس اني بخنقها .. عادي ارتكب فيها جريمه ..
ابوخالد : هذي خالتج سارة .. تعالي سلمي عليها
شيخه : ماعندي خاله اسمها ساره ... عندي خالتين بحياتي .. ناديه وفاطمه بس
ابوخالد : شيوخ كسري الشر وتحجي مثل الناس
تدرون .. ماقلت شي .. بس رفعت عيوني بعيون ابوي .. وجني اقوله خلاص .. اسكت لاتكمل .. علشان مااكرهك زياده .. لاتلوموني .. ماكنت اشوف يدامي غير صورة امي طايحه .. واللي ذبحتها واقفه يدامي .. وابوي ... ااااه ياحرقة قلبي عليك يايبا ..
سارة بنبرة استعلاء ومكر : هلاشيخه .. انا ..
شيخه بنظرة كره : اششششش ... اسمي لاتوصيخنه بلسانج ..
قلت هالكلمه وطلعت فوق .. احتراما لابوي .. لاني ان تميت هني راح ازنطها ..
لقيت منور واقفه بره غرفتها باستغراب
منيرة : منو قافل غرفة امي ؟
شيخه : انا ... هذا اللي ناقص بعد سويرة تنام مكان امي
منيرة : ههههههههههههه والله انج مو هينه .. وابوي ؟
شيخه : نقلت اغراضه تحت .. ماله مكان بهالغرفه
منيرة : شيووووخ ماتخافين تنزفين !! .. والله انه ابوي بيغسل شراعج ..
شيخه : عادي .. انا تعودت على الزف .. وبعدين خل يقول اللي يقوله ويسوي اللي يسويه .. اهم شي غرفة امي ماتنجس بسويره
منيرة : كفوو يابنت ابوج ههههه
شيخه : لاتقولين بنت ابوي .. قولي بنت امي ..
منيرة : شيوووخ .. حاسه فيج .. بس هدي اللعب شوي .. وحاولي تتجاهلينها عشان المشاكل
شيخه : لا .. مو شيخه اللي تسكت منور .. اذا انتوا بتسكتون انا مستحيل اسويها .. روح الغاليه ماتروح هدر جذيه .. والله والله .. اني باخذ بحق امي .. وبطلعه من عيونها
ابوخالد ينادي من تحت : منيرة .... منورررر !!
منيرة بخوف : ياويلي انا مالي شغل !!
منيرة : هلا يبا ..!!
بوخالد : وين الخدامه !! ..
منيرة تطق شيوخ .. : قولي .. نطقي اشوف ..
شيخه : سكتي انا اللي بتحجى
نزلت تحت ومن على الدري قلت لابوي
شيخه : الخدامه ببيت حصوص .. عندها شغل وطرشناهها احنا مانحتاجها .. لان متعودين نسوي شغلنا بيدنا .. الحمدلله امي ماعودتنا على الكسل ..
ابوخالد تعوذ من بليس .. ماوده يزفها ولا يقولها شي .. عارف ان الموضوع صعب عليهم بس لازم يتقبلونه : زين قولي للطباخه تيي تشيل الجناط من السيارة ..
شيخه : وليش الاميرة الناعسه ماتشيل اغراضها وتفكنا .. الخدم مايشتغلون عندها ترى ..
قلت هالكلمه وصعدت فوق .. وسكرت الباب على غرفتي .. ومنور عيونها بتطلع ..
منذ /04-23-2009, 06:11 PM
رد: ناكر المعروف مابين بعينك / روايه 
المواضيع المتشابهه 
![[ Thanks Pink & Candy 3hood ]](images/Pink-Candy/31.gif)
العرض العادي
