ناكر المعروف مابين بعينك / روايه

[SIZE=5]الجزء السادس

[RIGHT][COLOR="Black"]غرفة منيرة
مها كانت منسدحه على السرير ومنيرة قاعدة على المستواليت ومجابله مها
مها قاعدة تقلد اخوها وهو يكلم شيخه : احم .. شيخه تعالي قعدي يدام ههههههههههههههههههاااي
منيرة : ههههههه .. بس انتي لاحد يسمعنا ..
مها : يحليلهم .. امووت واعرف شقاعدين يقولون
شوي ولا تدخل شيخه انقزت مها من قعدتها وتربعت على السرير
مها : اهلا اهلا بالعشاق ... بسررررعه تقوليلي شنو قالج ناصر بالحرف
منيرة تبتسم
شيخه من غير أي تعابير تيي وتقعد يم البنات : عادي .. موضوع كلمني فيه ويبيني اساعده
مها : قولي زين شنو ؟
منيرة باستنكار تشوف تعابير شيخه اللي تدل على ان الموضوع كبير بس شيخه تحاول تكون طبيعيه : شصاير شيخه
شيخه تعدل قعدتها وتستجمع باجي القوة اللي عندها : ناصر .. متزوج
مها شهقت ومنيرة حطت ايدهه على حلجها بمعنى الاستغراب وكلهم باين على ويوهم الدهشه والصدمه
شيخه تشوف مها بنظرة وجنها تستحقر اخوها : ناصر متزوج من زيملته الامريكيه وعنده منها ولد
قالت هالجمله وقامت ابتعدت عنهم وراحت صوب الدريشه تحس روحها بتطلع مع كل كلمه قالتها .. تحاول انها تصمد وتكون مثل الجبل اللي مايأثر عليه شي .. بس غصبن عليها انزلت منها دمعه امسحتها قبل لا يشوفونها البنات
مها قربت من شيخه : انتي شتقولين شيوخ .. من صجج ولا تغشمرين ؟
منيرة كانت هامتها اختها اكثر من أي شي بالدينا وتعرف ان شيخه تميل لناصر فحست شكثر شيخه تحاول تبين ان الموضوع عادي عندها بس كلشي مكشوف بويهها
كان شكلها اشبهه باللي معطينه كف .. ملامح مصدومه وتعابير مشتته
منيرة : وليش يقولج انتي ؟
شيخه : يبيني افاتح امي بالموضوع عشان تقول للخالتي ناديه لان مو عارف شلون يقولها
مها كانت ساكته .. موضوع زواج ناصر ماخطر ببالها ابد وماتوقعت ان بيي اليوم ويتزوج اخوها بهالطريقه
عم الهدوء المكان من غير دموع شيخه اللي ماقدرت انها تحبسهم اكثر .. كانت تبجي بصمت وهي لافه صوب الدريشه .. تحس انها كانت عايشه بوهم .. بحلم سخيف وبايخ .. حست بالخيانه للنفسها لانها اعشقت شخص مايدري عنها
منيرة قربت يم شيخه وحطت ايدها ورى ظهرها واحضنتها : مافي دعاي للبجي شيوخ .. اللي مايفكر فيج لاتفكرين فيه
اهني شيخه لاشعوريا بجت وبجت ... حضنت منيرة وبحت .. قهر على روحها وعلى مشاعرها الطفوليه ..
مها قربت منها وحضنتها : شيوخ حبيبتي لاتبجين الله يخليج .. والله ناصر الزفت مايستاهل ظفرج .. خليه بهالمصيبه اللي يابها له ولنا ..
شيخه امسحت دموعها : من قالكم انا ابجي عليه .. انا ابجي لاني ضعفت في وقت المفروض مااضعف فيه .. لانصور لاغيره يبجيني ..
منيرة تعرف شيوخ انها قويه بهالمواقف .. بس يمكن لانهارسمت حلم زايف وعاشت فيه خلا الصدمه عليها قويه شوي
مها : شيخه .. انا اللي بقول لامي .. ماله داعي تبلغين خالتي
شيخه : لا مها ..لاتقولين لامج شي معليه امي يمكن تعرف شلون تبلغ خاتي ناديه .. احسن منا
منيرة : زين انا عيل بقول لامي ..
شيخه باصرار : لا ... انا ببلغها
وطلعت شيخه بعد ماامسحت دموعها .. مو شيخه اللي تبجي علشان واحد مثل ناصر .. مو شيخه اللي تخسر ياناصر .. والله والله .. ان انتا اكبر خسران .. والايام بتثبتلك
مها : منور .. انتي مصدقه اللي سمعناه !!
منيرة سكتت ماعرفت شترد .. الخبر مفاجأ للكل ..مابين على ناصر انه مخبي شي .. حتى بسوالفه وكلامه
مها : منوووووور لاتسكتين .. ترى انا احس اني بنفجر
منيرة : شقول مهاوي .. الصراحه مصدومه
مها : الله يعينج ياشيوخ .. عورني قلبي عليها احس انها مكسورة بس تحاول انها ماتبين هالشي
منيرة : ماعليج من شيخه .. صح ان المضوع اثر فيها بس شيخه قويه وباجر بتلقين الموضوع مو هامها




ونزلت شيخه عند امها وبلغتها اللي انصدمت بالخبر وقعدت تبجي .. وشيخه بهدوء تام .. سمعوا الصوت مها ومنيرة وصلاح والكل تيمع ودرى بالخبر
الكل كانت له ردة فعل مختلفه .. الا شيخه مشاعر غضب وحزن وكبرياء مختلطه مو عارفه ترتبها .. صعدت غرفتها الليل وتلحفت بلحافها .. تفكر
شلون قدر يغلبني .. شلون كان يرسم لشي وانا افكر بشي ثاني .. ليش ماانتبهت . ليش انجرفت ورى احاسيس واهيه
كانت تحس بالقهر .. منو يغلب شيخه ...ناصر !!
لازم ابين للكل ان انا الكسبانه وه والخسران .. خله يعيش مع بنت الاجانب وبنشوف السعاده اللي بيعيشها
امسكت دفترها وودعت اخر محطات حبها مع ناصر .. ناصر اللي باعها برخيص ..

انا لامن دمعي طاح من عيني على مخلوق
فلابد هالمخلوق معه يطيح من عيني
ولو الدمع لطاح لتحت يرجع ويرقا لفوق
فلا يرجع معه يرقا لعيني من يبكيني

سكرت دفترها وحطته بالدرج عقب حاولت تنام لكنها مااقدر بالاخير فكرت تطلع شوي تصب لها حليب عقب قالت بقلبها : مم خل اشوف منيرة يمكن قاعده اسولف معها شوي
طقت الباب عليها ولكن لا جواب ... شكلها بسابع نومه هالكسلانه
يعني مافي الا اسهر مع روحي ..
نزلت وراحت صوب المطبخ وصبت لها حليب وقعدت على الطاوله تشرب .. شوي ولا ينفتح باب المطبخ بقوة وكان اللي داخل اهوا .... عزوووووز
شيخه اول ماشافته مااستوعبت انه اهوا لان ليت المطبخ كان مسكر ومفتوح الليت الصغير .. اوقفت وتمت بمكانها تتأمل هالريال اللي دخل وفتح الدرج بسرعه وهو يدور شي
شيخه تنرفزت ... هذا اخاف قاعد ببيتهم يدخل علينا جذي .. صج مايستحي : ممكن مرة ثانيه تطق الباب قبل لاتدش
لكن عزوز رد عليها بصراخ خلاها تنقز من مكانها : بسرعه شيخه ابي فوطه وثلج ومااااي الله يخليج
شيخه اخترعت : شصاير ؟؟؟؟؟؟
عزوز : خالد ... خالد قاعد ينزف بسرررررررعه
شيخه شهقت وبسرعه راحت الثلاجه وطلعت ثلج ويابت فوطه وماي بارد وعطتهم عزوز اللي طلع من المطبخ بسرعه وراح للدوانيه
اما شيخه راحت يابت جنطة الاسعافات وركضت صوب الديوانيه وايدها على قلبها .. حست انها بنفقد اخوها .. احساس انها مراح تشوف خالد بعد اليوم

اول مادخلت الدوانيه لاشعوريا طاحت الجنطه من ايدينها وهي تبجي وتنادي :... خااااااااااالد !!!!
خالد كان راسه ينزف دم وويه منفوخ ووارم وعيونه مفتوحه نص وشكله فقد الوعي
عزوز اللي كانت عيونه مليانه دموع : شيخه دقي على الاسعاف بسررررعه
بس شيخه افقدت أي احساس حوالينها وماقامت تسمع غير صدى كلمات مو مفهومه وظلمت الدنيا بعيونها

اليوم الثاني
شيخه كانت قاعده بمكان عاااااالي وفجأة حست ان المكان صار كله ماااي وهي قاعده تغرق .. تنادي بس محد سامعها شافت عزوز واقف قريب منها والماي وصل الى حد راسها .. قامت تصارخ ياناس راح اغرق لحقوني
وصرخت بصوت عالي : عزوووووووووووووووز

مها : بسم الله عليج شيوخ شفيج ..
شيخه فتحت عيونها .. انا شايبني هني .. شنو صار ..!! وليش خلاتي كلهم هني .. احس بصداع وراسي يفتر
ومسكت راسها بالم : آآي
خاله فاطمه : اسم الله عليج يابنيتي الحمدلله على سلامتج .. ارتاحي يما نامي شوي
شيخه بتبجي : وين امي ؟
البنات قاموا يطالعون بعض عقب قربت خاله فاطمه : انتي لاتعبين روحج امج شوي وبتيي الحين ان شالله
شيخه : وين منيرة وحصه وخالـ ــ ــ
شيخه وعيونها تدمع من غير لاتحس : خالتي .. انا حلمانه ان خالد قاعد ينزف .. وحوالينه دم واااايد وين خالد ؟
خاله فاطمه : ... خالد تعبان شوي يما .. بس توه ابوج كلمنا وقال مافيه الا العافيه وكاهو ياي بالطريج
شيخه انصدمت : .. ابي اشوف خالد الله يخليكم .. وين امي .. وين منيرة
ولاشعوريا ماحسيت بروحي الا وانا اصارخ ... خااااااااااالد ... ابي اشوف خاللللد
ورفعت اللحاف ابي اقوم اوقف بس حسيت ان غرفتي كلها قاعده تدور ... ورجعت قعدت
وعقبها تميت ابجي .. لان فعلا ماكنت قادرة اسوي شي ..
كانت خالتي فقاطمه تقرى المعوذات والقرأن وانا ابجي ومها تمسح على راسي
وماحست الا وانا غاطة بنوم عمييق

بنفس الوقت
المستشفى
وابوخالد وصلاح وناصر وسلطان واقفين بالممر
وام خالد تبجي ومنيرة وحصه يحاولون يهدونها
عزوز وجاسم عند الدكتور
الطبيب : والله مش عاير اخبي عليكو بحاقه .. اصابة خالد مش سهله ابدا .. والنزيف كان كتيير ..علشان كده يبقى تحت الملاحضة لمدة يومين نطمن عليه كويس .. وبعديها تقدروا تشوفوه
عزيز غمض عيونه وهو تعباان من امس مانام .. تمنى يسمع كلام يطمنه عن اخوه وروحه .. كلام يقوله ان خالد مافيه شي .. وبيطلع معاهم ..
الطبيب : بس فيه اجراءات عايزين نعملها .. بالنسبه للضربه اللي اصيب فيها خالد .. حنضظر نبلغ التحقيقات في الموضوع
جاسم يكلم عزيز : شللي صار عزيز .. قولي بالتفصيل
عزوز فتح عيونهوهو يمسك راسه و يحاول يستثكر اللي صار وجنه صارله سنه وعقب قال : ماادري انا كنت بيتنا .. دق علي خالد ورديت عليه .. قالي الحقني عزوز راح اموت .. قلته شفيك مارد علي كان يشهق بقوة .. قلتله وينك قالي انا صوب البحر .. وانا اعرف هالمكان دايم يروحله خالد .. رحت ولقيته ينزف .. خذيته البيت بس غشى عليه ونقلته المستشفى بسرعه
الطبيب . كل حاقه حتبان بس يصحى خالد ان شالله .. انتوا ماتشلوش هم .. والشرطه مجوده حنعرف اللي حصل بالضبط
جاسم يهمس لعزيز : عسى خالد مو متورط بشي !!
عزوز : مااعتقد .. خلود من هالنوع جاسم .. تطمن

طلعوا من عند الطبيب واتجهوا لوين ماكان بوخالد والحريم قاعدين
جاسم راح يطمن خالته والبنات اما عزيز راح يطمن الشباب وبوخالد
عزيز : عمي ترى وقفتك هني مالها داعي .. انا اقول تاخذ امي والبنات وتردون البيت واحنا بنتم هني بس يقعد خالد بنبلغكم
بوخالد ماكان بيروح بس رضيه كانت تعبانه ولازم يكلمها ترد وياه البيت من امس مانامت
وراح صوب البنات
ابو خالد : يله ياام خالد .. الطبيب يقول ان خالد ان شالله بيقوم بالسلامه واحنا ماله داعي نقعد هني لازم نرد البيت .. والشباب هني
رضيه وهي تمسح دموعها : مابي .. ابي اشوف ولدي .. طمنوني على خالد الله يخليكم ..
كانت ام خالد شكلها يقطع القلب .. كانت تبجي بحرقه .. خلود ولدها الغالي شلون تشوفه طايح بالمستشفى ولا تقدر تسويله شي
ابو خالد : يابنت الحلال ماراح ينفع البجي .. قومي ادعيله وان شالله الله بيقومه بالسلامه
رضيه وهي تمسح دموعها : نادولي عزيز ... ابي اكلمه
قامت حصه وراحت صوب ريلها وقالتلها ينادي عزيز امها تبيه
ويوم قرب عزيز ماقدر يمسك روحه حس انه منهار .. اول ماشاف ام خالد ارتمى بحضنها وقعد يبجي مثل الطفل اللي فقد اعز ماعنده .. مثل الانسان الضايع

رضيه رفعت راسه شوي : وقالتله : عزيز .. خالد بيعيش .. !!!
عزوز : ادعيه يمه .. الله يقومه بالسلامه
قرب بوخالد وسلطان وناصر من عزوز حاولوا يهدونه شوي .. واقنع ام خالد تر دالبيت اهيا والبنات وبوخالد
اما الشباب فتموا بالمستشفى الين ماييهم خبر يطمنهم عن خالد

في البيت
كان الكل قاعد بغرفه شيخه اللي رجعت نامت وويها مبلل بدموعها .. وام خالد تبجي من صوب ومنيرة تبجي اختها واخوها .. كان الكل في حالة حزن مو طبيعيه
في المستشفى
بعد ساعتين
جاسم وناصر وسلطان راحوا يصلون الظهر .. اما عزيز وصلاح تموا قاعدين يمكن خالد يقوم عالاقل فيه احد موجود
عزيز كان قاعد على الكرسي يم صلاح اللي كان اقوى منه بمليون مرة
سند راسه على الطوفه .. وغمض عيونه .. تذكر شكل خالد وهو ينزف ..وهو يشاهق ويقول بمووت ... لحقوني بمووت .. تذكر شيخه .. ولاشعوريا بسرعه طلع منه هالسؤال
عزيز : صلاح شلون شيخه ؟.
صلاح سكر القرأن اللي كان يقرى فيه : ماادري قبل شوي دقيت على منيرة تقول قعدت وقامت تصارخ تنادي على خلود ... ورجعت نامت
عزيز سكت متألم .. شكلها كان يعور القلب يوم كانت طايحه ماقدر يسوي شي .. قعد صلاح من النوم واهوا خذا خالد وطار فيه المستشفى .. شلون هانت عليه طايحه وماسوى لها شي ..
عزيز : صلوح .. دق تطمن على شيخه
صلاح : لاتخاف بتقوم ان شالله .. لاتحاتي ..
شوي ولا الشباب يوون .. قاموا عزيزوصلاح يصلون .. ويدعون ربهم يفرج عنهم هالمصايب
بعد يومين
استقرت حالة خالد ونقلوه لغرفه عاديه وشيخه على طول راحت له مع انها كانت تعبانه وماتقدر تتحرك
التحقيقات اسألوا خالد عن اللي صار وخبرهم ان ريال مايعرفه طقه باله حاده ووصف لهم مواصفات هالريال والقضيه مستمرة

في الغرفه
خالد : الله لو ادري اني عزيز وغالي جذي جان كفخت روحي بنفسي ههههه
ام خالد : ويي اسمله عليك الرحمن الرحيم ... عدوينك اللي يكرهونك
صلاح : ههه الحين بتييكم شيووخ عاااد مسكينه ترى بسبتك البنت اغشي عليها
خالد بصدمه : شيخه ..!!! ليش شفيها
صلاح : اختك الرقيقه ماتحب مناظر الدم تعرف .. بسكوته مو بنت
خالد : بعد قلبي والله شيوخ .. صج ان لسانها اطول منها بس مافي احن من قلبها
ام خالد : يله يما خلود .. هالفواكه كلها تاكلها .. يله
خالد : بس يماا .. ناويه تطلعيني درااام يعني .. راح امتن انا مو زين
ام خالد : اكل يماا فديتك .. ضعفان انتا اكل
صلاح : انا ابي بعد شدعوه عطوني ويه
خالد : انتا متغدي .. مو باجي الا تاكلني
ام خالد : قل اعوذ برب الفلق .. هو شفيكم انتوا اليوم
صلاح : مابي مابي .. شنو كله تدلعين ولدج .. انا ولد البطه السوده يعني !!
خالد : ههههه يمااا .. يعني انتي البطه السوده
ام خالد : صلووووح ماتستحي انتا
صلاح : اووو .. الحين بتقلبونها علي .. ادري انا الحين مالي رب .. ولدها مكسر وماتشوف غيره .. اطلع انا احسن لي .. يمكن الاقي سيلانيه تعطف علي
خالد بضحك : كفوك ههه
وهو طالع صلاح طلع بويهه عزيز : اكملت .. كنت بواحد صرت باثنين .. يمااا دلوعج الثاني وصل .. روح روح
عزيزيضحك وهو يضحك : ههههههههه شفيه هذا ؟
خالد : ماعليك منه الغيره .بعد شنو !!
عزيز : يحقله يغار .. دلال من كل صوب شتبي بعد
ويقرب ويبوس راس ام خالد : شلونج يما اليوم ؟
ام خالد : بخير فديتك .. تعال اقعد
عزوز : لا انا بقعد يم خلود حبيبي .. سولي مكان لوسمحت
ويدني خالد وينسدح عزوز يمه بالفراش
خالد : اييي عورتني .. يااخي شالهدفاشه
عزيز : عيب عليك ريال طول بعرض تقووول ايييي شخليت حق البنات هااا !!
ام خالد تضحك : هاك فديت قلبك عزيز .. خذ تفاح
خالد : اشوف خذيت الجو .. قووووم اطلع يله قوووم
عزيز : هههاااااي تحلم .. حبيبي انا مو نايم والصراحه سريرهم مريح
ويمسك اللحاف ويتغطى فيه آآآآآه ياسلام من زمان مو نايم .. فيني فقر نوم وراحه
خالد : قوم ولا ترى اشكتي عند الرسبشن اخليهم ييرونك بره
عزوز يقوم : صج انك مو ويه واحد يسويلك شي .. الفضل لله ثم لي انك عايش
و يطقه على ايده المفوفه
خالد : أأأأأأأأأأأأأأأأأي
عزوز : هههههه اسف اسف ..
ام خالد : شفيكم انتوا ركدوا شوي ...

شوي ولا يدخل ابوخالد ومنيرة وشيخه
ابوخالد : سلامات .. سلامات يالغالي اجر وعافيه ياولدي ماتشوف شر
منيرة تدش ورى ابوها بابتسامه وتحمد لخوها ووراها شيخه
عزوز عدل قعدته ووخر شوي عن خالد ووده يرفع عيونه صوب شيخه .. يبي يشوف ويهها أي تعابير بوييها يبي يطمن عليها بنفسه بس مستحي يرفع عيونه عليها يدام ابوها وامها واخوانها
الين ماقربت شيخه تسلم على خالد هني ماقدر الا يرفع عيونه ويشوفها


شيخه : ماتشوف شر عمي خالد .. هذي الشطانه وماتسوي
خالد : هلا وغلا الشر مايييج .. وانتي بعد الحمدلله على السلامه هههه
شيخه انحرجت : كله منك .. انتكست انا بسبتك ههه
وعلى ابتسامتها سمعت صوت ماسمعته من يومين .. صوت ذكرها بدم خالد ومشهد تتمنى تنساه طول عمرها
عزيز : الحمدلله على سلامة خالد ياعمي .. مايشوف شر
لاشعوريا التفتت له وعقب شاحت بعيونها صوب اخوها وهي تبتسم
منيرة : خلوود .. تبي قهوة ؟
خالد : اييه ماعليج امر وصبي لعزيز بعد
خذت منيرة القهوة وصبت لاخوها ولعزيز ولابوها وامها
ام خالد : شيخه يما وزعي الحلو
قامت شيخه بهدوء وخذت صحن الحلو وعطت ابوها
بوخالد : لاهنتي يابنيتي .. لاعدمناج ان شالله
شيخه تبتسم .. ماتتصورون فرحتي لما ابوي يقولي هالكلام .. احس اني غير عن الكل .. مع انه هالحجي يقوله لنا كلنا .. بس والله احس بشي مااعرف شلون اوصفه لكم .. مثل الماي البارد يعني ايام الهده بالمدرسه
عقب قربت شوي ومدت ايدي بالصحن لعزيز وعيوني على الحلو : تفضل
عزيز : زاد فضلج تسلمين ..
ورفع عينه بعينها مجرد ان يحط عينه بعينها حس انه تطمن عليها ولو انه باين عليها التعب شوي وعقب قالها : الحمدلله على سلامتج شيخه .. ماتشوفين شر
شيخه اضطربت .. تبي تبعد عيونها من عيون عزيز السوودة ونظراته اللي فيها كلام وايد .. بس ماقدرت
عقب قالت وهي تمشي بعيد : الله يسلمك

عزيز بقلبه : ضحك .. ماايدري ليش لما يشوف هالشيخه ييله احساس بالاجرام .. بالنشوه وبكل شي حلو
قام من مكانه وقال : يله انا ماشي .. اييك ان شالله بالليل ..
شيخه تنقز منيرة : شكو احنا بنتم مع اخونا الين الليل مانبي عذال
منيرة : هههه سكتي
عزوز يناظرها على السريع ويبتسم لخالد : وبناااااام عندك !! لاتعشى مع احد بيب عشى
لاشعوريا شيخه قالت : لا احنا بنتعشى مع خالد
عزيز وهو طالع : بدق عليك وقولي شتبي تاكل عشان اييبه
اهني شيخه طلعت عيونها ... مايسمع هالغبي .. قلنا بنعشى مااخونا اهوا شكو رزة ويه اووووف

طلع عزوز وهو ميت من الضحك : احسن ياشيووخ .. قلعتج عشان تبطلين هاللقافه ..
خذا تلفونه ودق على واحد من ربعه بالدوام عشان يروح معاه ياخذون اجازة لخالد وعقبها بيرد البيت ينااام الين الليل

بعد اسبوع طلع خالد من المسشفى وسوت ام خالد عشا ببيتها بمناسبه طلعت خالد بالسلامه وبنفس الوقت تبلغ اختها بزواج ناصر وشلون بتقدر تفهمها السالفه
الكل كان مجتمع وكاشخ والربشه كانت من كل صوب
منيرة وشيخه بالطبخ يزهبون العصير والحلو لان العشا طالبينه من برى
شيخه كانت لابسه بلوزة اوف وايت مفتوحه من صوب الايدين ومربوطه بزاير مع تنورة بيجيه فيه قصات حلوة اما منيرة كانت لابسه بلوزة سيلفر مع تنورة سودة اوركانزا جنان .. حصه لابسه اهيا ومريومه بنتها نفس الشي
اما مها رغم انها كانت مستانسه بطلعت خالد الا ان زواج ناصر عكر عليها مزاجها .. للحين ماصادفته ولا كلمته وخايفه من ردت فعل امها .. وتدعي الله يمشي هالموضوع على خير

المطبخ
حصه : شيووخ ماخلصتوا ..!! .. يله ترى فيه حريم ييوو بعد
شيخه : وين بنخلص ومريوم بنتج مثل القطو تحوس هني .. طلعيها رجاءا
حصه : مسكينه تبي تساعدكم ..
شيخه : مو وقته ترى .. بعدين بنتج قليله ادب .. اقولها طلعي تقولي مالج شغل
مريومه تبجي .. وحصه تلمها
حصه : شيووخ لاتصيرين نحيسه كسرتي بخاطرها ماتعرفين تكلمينها شوي شوي ترى مالي خلق صراخها اووف
منيرة : تعالي مريووم حبيبتي ..
شيخه : محد مدلعها غيرج منور ..
تدش مها : مساااااااااااااء الورد يابنات الخاله العزيزات
حصه : هلا مهاوي تعالي ساعديهم لان بعض الناس بينفجرون بعد شوي
شيخه : اووووف .. انا مشكلتي اني طيبه وماارد عليكم
حصه : ههههههههههه .. ياطيبه انتي ..
تعالي مريومه حبيبتي .. خلصوا العصير ويبوه بسرعه
منيرة : ان شالله عمتي
شيخه : واذا خاطبهم الجاهلون قالوا سلاما
مها : ههههههههههاي حلوة شيوخ ..
اقولكم تبون Any Help !! !!
منيرة : اتعب على الانكليش ههههه
مها : احم احم .. اعجبج
شيخه : مهااوي حبيبتي انتي صبي عصير الفراوله بالقلاسات اللي هناك
مها : من عنوني .. اقولكم يابنات .. انا الصرراحه خايفه اليوم اذا درت امي بزواج ناصر
منيرة تغمز لمها عشان تسكت
وشافتهم شيخه سكتت شوي عقب ضحكت : ههههههههه .. شفكيم انتوا
مها تقرب يم شيخه : شيوخ .. الصراحه انا ماا .ـــ ــ ـ
قاطعتها شيخه : مها .. عن الينون .. اخوج مثل اخوي اصلا ماعمري حبيته بس تعرفيني انا انفعلت من الموضعوع لان قالي ياه انا
منيرة طلعت عيونها ومها اكثر
مها : شنو تتوقعون ردة فعل امي ؟
منيرة : مم اتوقع خالتي بتعصب بس بعدين بترضى بالامر الواقع
مها : حتى انا .. شرايج شيوخ ؟
شيخه : والله كل تصرف يطلع من خالتي معذورة فيه .. اللي يسوي سوات اخوج خسران .. وبيندم عليه
مها بضيق : ادري .. بس شنسوي
منيرة : كششششششخه .. مها مرت اخوج امريكيه هههههههه
مها : عاد شلون اكلمها انا .. بروحي قوطي بالانجليزي
شيخه : ههههه بالاشارة ياماما ههههههههههاي
وقعدوا البنات على ضحك ووناسه .. شيخه نست او تناست موضوع ناصر .. تحاول انها تسوي روحها عادي رغم انها متألمه من داخل مب الم الحب ولكن الم الخسارة .. شيخه ماتحب هالشعور تحب تكون دايما اهيا الربحانه
الساعه 11
بيت بوخالد
اغلب المعازيم راحوا ومابقى غير الاهل .. خاله فاطمه ام جاسم وخاله ناديه ام ناصر والبنات كهم ..
شيخه قاعده يم مها وتاكل مشويات اهيا معاها بنفس الصحن لانهم ماكلوا بسبب ربشه الناس والحوسه
شيخه : ممم ياااي يماا كل مرة طلبوا من هالمطعم .. لذييذه مشوياته
مها : الله .. والله عجيييب .. شيوخ ابي بعد كباب فيه !!
منيرة وهي تشيل باجي القلاسات والصحون من الطاوله : فيه مهاوي .. قومي شيخه يبيلها
حصه : شيووخ يبي معاج سلطه جرجير
بدريه اخت مها : ومعاج انا ماعليج امر
شيخه .. اووف .. كلشي على راسي انا : ان شالله .. اوامر ثانيه !!
مها : ههههه جنهم بيتعشون مرة ثانيه
شيخه : اقوول .. نييب لكم الثلاجه بكبرها شرايكم !!
ام خالد : روحي شيووخ بلا طواله حجي .. وقولي للخدامه تييب الجاي وتوديه غرفه الاستقبال
مها تطالع شيخه ومنيرة وقفت .. شكلها ام خالد الحين بتقول لخالتي ناديه عن موضوع ناصر .. الله يستر
شيخه : من عيوووني ياام خالد
ام خالد : استحي يابنت
شيخه : هههههههههههه
مها : قااااامت لنا خالتي .. انحاااشي
شيخه وهي تركض : حلفي ههههههه توبه يماا مااقووووولها مرة ثانيه

راحوا مها وشيخه المطبخ
وهناك قعدوا يزهبون الصحون وحطوها بصينيه كبيرة شوي وقالت للخدامه تسوي جاي
مها : شيووخ والله انا خايفه الله يستر
شيخه : ماعليج امي قدها ونص .. ان شالله مايصير الا الخير
مها سكتت وهي تشوف شيخه .. عقب قالت : شيووخ .. انتي صج حبيتي ناصر ؟
شيخه رفعت راسها وهي تبتسم :شوفي مهاوي .. انا ماحبيت اخوج وحتى لو حبيته صدقيني بعد اللي صار ماقام يهمني ..
مها : عيل ليش يقولون اللي يحب مايقدر يكره ؟
شيخه : ههههههههه .. باي مسلسل مصري سامعتها ؟
مها : ههههههه مالت عليج زين .. صج صج شيووخ .. ماعمرج حبيتي غير اخوي
شيخه : مهاااااوي جـــــــــــــــب
مها : هههههههه .. خلاص يبا ماعاد نييب طاري هالناصر .. ماعمرج حبيتي احد مثلا ؟
شيخه : ههه من وييين يعني ؟
مها تشوف شيخه بنص عييين ...
شيخه ... هذي شفيها : شفييج تطالعيني جذي؟
مها : اخاف اقول تكفخيني !!
شيخه : قولي ماراح اكفخج حييل ... على خفيف من غير اصابات مبرحه
مها وهي تغطي روحها بالصحن : عزوووز مثلا
شيخه : ماااالت عليج وعلى عزووز فوقج .. وخري عني لااكسر الصحن على راسج
مها :هههههههههههه اضحك معااااج خلاص
شيخه : انزين انطمي
مها : شيووووخ اضحك معاااج .اسفه والله
شيخه : سامحتج .. خلاص بس انا اللي بسألج الحين
مها : شنو ؟
شيخه : تقوليلي انتي شسالفتج على هالسؤال ؟
مها : مااكو .. بس جذي
شيخه تلتفت لها : وانتي ؟
مها : ماعمري حبيت .. ولا افكر احب .. الصراحه انا مع ان الحب يي بعد الزواج وهذا الحب اللي بيكون وراه سعاده وحياة حلوة اما غيره ماييب الا الحزن والدموع
شيخه : انا مع الحب ان كان قبل او بعد .. شرط انه يكون هالحب صادق ..
شوي ولا يندق باب المطبخ
مها : بسم الله .. منو !! .. ليكون ناصر سمعني بينحرني هنيي !!
شيخه : لحظة
وراحت صوب الباب وكان خالد : هلا خالد
خالد : احم .. منو عندج ؟
شيخه باستغراب : لييش !!
خالد : بس مايصير اسأل يعني !!
شيخه وايدها على خصرها : مها .. اخلص شبغييت خلوود
خالد : زين يعني يصير ادش ..
شيخه : اوووف البنت مو لابسه حجابها .. لحظة
وشيوخ تصرخ : مهاااوي لبسي شيلتج خلود بيدخل
مها انصدمت .. ياوليلي لوسمع كلامي فشله شبيقول عني ..
وبسرعه لبست شيلتها وعدلتها ..
شيوخ وهي تاكل شبس : ادخل خلوود ..
خالد : احم .. السلام عليكم
مها : وعليكم السلام ..
خالد : هلاا مهااوي عندنا .. شلونج ؟
مها تبتسم : بخير الحمدلله .. انتا شلونك ؟
خالد : بخير دامج بخير
وللحينه مبتسم
شيخه ... يسوي روحه ماييدري ان مهاوي هني .. شكو يسأل يماااا منك خلوود .. بس بس لا يشق حلجك من هالابتسامه ..
شيخه : يله مهاوي ..
وتكلم مااري .. : سوي جاي ووديه غرفه الاستقبال انزين
خالد فتح الثلاجه وسكرها .. اصلا انا ليش دخلت ماادري .. الصراحه عجبني كلام مها يحليلها .. عفيه هذي البنت مو شيووخ .. هذيج دواها بعدين ..
شيخه : خلوود اسمع .. امي الحين بتكلم خالتي ناديه بموضوع ناصر اهوا هني .. ؟
خالد اخذله كوب عصير من الثلاجه وقعد : ايييه ... الصراحه ماودي اقعد الحين هالحريم بيسونها مناحه وصراخ واحنا مالنا خلق
شيخه : بعد تبيهم مايسوون له سالفه انا لو مكانه ماااوري احد ويهي من الفشله
مها : يله شيخه انا بروح .. يبي الصينينه معاج
شيخه : لحظه لحظه .. تعاااالي هنيي ..
مها : هلا ؟
شيخه وهي تفكر بخطه : لحظة بحط شغله وايي
رجعت مها وهي تعدل شيلتها ووقفت يم الصينيه
شيخه وهي تنحاش : بيباااااااااااااي يبي الصينيه وتعاااالي بسرعه
مها : شيووووووووووووووووخ يحماااااارة تعاااااالي
بس ماوصل صوت مها لشيخه ورفعت عينها اللي شافت خالد مبتسم ويشرب العصير
خالد : مالي شغل ماراح اشيل شي لا تبلشوني .. بروحي مكسر
مها : ههه خلاص مانبي منك شي يبا .. انا بشيلها
حاولت تشيلها مها وكانت ثقييله حييل وماانتبهت لايد خالد المحطوطه على الطاوله ونزلت الصينيه حيييل مما أدى الى صرخه الم مدويه
خالد : آآآآآآآآآآآي
مها ارتبكت وشوي وتبجي : امبيييي اسفه !!
خالد بالم : شيلي الصينيه بسرعه ... يالخبللللله
مها .. صج اني خبله بسوي روحي بطله يعني .. وبسرعه بعدت الصينيه من ايده وقعدت تشوفها
خالد وهو مغمض عيونه : آآح .. تبين تنتقمين من شيوخ فيني يعني
مها بخووف وبراءة اكثر : لا والله .. اسفه ماشفتك تعورك ؟
خالد صج اني تعورت بس الصراحه مستانس انها خايفه وعجبني الشعور : اييييي وااايد والله
مها : ياربييي .. شسوي ورني شوي !!
خالد وفيه الضحكه بس ماسك روحه .. اخاف دكتوره بس : شتشوفين الالم داخلي
مها باستغراب : شلون يعني ؟
خالد ... هذي شقولها بعد : يعني غير ملموس يالخبله
مها وهي تمسح دموعها : لاتقول خبله رجاءا
خالد : اسف
مها : انا بعد اسفه .. بنادي خالتي
خالد : لا خلاص عادي مايحتاي شوي وتخف
مها : زين .. شنو اقدر اسويلك !!
خالد وهو عاجبه هالخوف وعيونه بعيونها : ولا شي .. سلامتج
مها : تبي انادي شيووخ !!
خالد : لا لا كلش ولا شيوخ الفضيحه .. مافيني شي خلاص
مها قامت بارتباك بتشيل الصينيه بس بعدين فكرت تقول لماري تشيلها وراحت الصاله وهي مفوووووووله من شيوووخ وبنفس الوقت مفتشله من روحها